PADANG PARIAMAN - Katiko kito makan di Rumah Makan Padang nan punyo urang Piaman, ado tapampang poto surang inyiak bakupiah nan manyandang kain saruang. Urang tu lah nan dikana sabagai Ungku Saliah (Syekh Kiramatullah Ungku Saliah).
Untuak parantau Piaman, mamajang poto baliau bukan untuak mamanggak-an, tapi ado mukasuik jo arati nan mandalam.
Sabagai tando baso nan punyo lapau atau rumah makan tu asli urang Piaman.
Pambao Barakaik (Palarih): Dipacayo sacaro turun-tamurun bisa maniboan rajaki jo mambuek galeh laku.
Indak itu sajo Poto tu sabagai raso hormat ka sosok ulama nan sangaik diteladani.
Asa-usue jo Karomah Ungku Saliah
Ungku Saliah lahia pado tahun 1887 di Pariaman jo namo ketek Dawat (Dawaik). Baliau barasa dari suku Sikumbang (dari mandehnyo) jo suku Mandailing (dari ayahnyo). Sajak ketek baliau lah rajin baraja agamo ka babagai syekh, tamasuak ka Syekh Muhammad Yatim di Sungai Sariak, sahinggo mandapekan gala "Ungku Saliah" karano kasalehan jo budi nan mulia. Sasudah itu, baliau mandirikan surau di Sungai Sariak.
Urang Pariaman picayo baso Ungku Saliah punyo banyak kiramaik (kasaktian) pado maso hiduiknyo, di antaronyo:
Malinduangi dari Lando, katiko agresi militer Balando, surau tampek warga basuruak indak mempan kanai bom karano zikir baliau.
Sumbayang Ajaib, katiko ditangkok Balando, baliau acok tibo-tibo ilang dari kuruangan katiko masuak wakatu sumbayang
Maubek Urang Sakik, bisa maubek urang hanyo jo maracik tumbuhan apo se nan ado di adok-an baliau.
Sifat Dermawan nan Mambao Laris, Baliau acok balanjo indak maambiak baliak pitih . Ajaibnyo, lapau tampek baliau balanjo tu langsuang larih manih.
Ungku Saliah maningga pado 3 Agustus 1974 dan dikubuean di surau baliau di Lareh Nan Panjang, Nagari Sungai Sariak. Makamnyo nan disabuik Gubah Syekh Tuangku Saliah sampai kini masih rami dikunjuangi peziarah.
Pangaruah baliau masih taraso sampai kini, baiak dari paputaan ekonomi di surau (pinjaman pitih warga) hinggo panjualan foto baliau nan sabagian untuangnyo disumbangan baliak ka kotak amal surau.
Walaupun mamajang foto Ungku Saliah, nan paliang pantiang adolah manuladani sipaik, ajaran, jo amalan Islami baliau nan tuluih mambantu sasamo. Sasuai jo prinsip: Adaik Basandi Syarak, Syarak Basandi Kitabullah. (Roy)
