PADANG PARIAMAN - Pihak kapolisian masih taruih mandalami panyabauk pasti kabakaran hebaik nan tajadi di Pasa Ampalu, Kecamatan VII Koto Sungai Sariak.
Hinggo kini, proses panyalidik-an jo pangumpuean katarangan saksi masih balansuang di lapangan.
Kapolsek VII Koto Sungai Sariak, IPTU Edi Saputra, manyatoan baso jajarannyo masih malkukan panyalidiak-an intensif takaik insiden tu.
"Kami masih malakuan panyalidiak-an mandalam takaik kabakaran di Pasa Ampalu ko," kecek IPTU Edi Saputra.
Badasarkan pado hasil pamaresoan samantaro jo katarangan dari sajumlah saksi di lokasi kajadian, paristiwa kabakaran ko kuek dugaan dipicu dek masalah kalistrik-an. Didugo akibaik hubuangan aruih pendek (korsleting) listrik.
Manuruik katarangan saksi, api paramo bana nampak dari ciek titiak nan disabauk-an dek arus pendek, taruih langsuang manyala jo capeknyo.
Kudian, manuruik urang kampuang sinan, ancaman kabakaran akibaik masalah listrik ko sabananyo indak sakali ko tajadi di kawasan pasa tu. Sabalunnyo, insiden nan samo sampaik ampia tajadi, tapi barasil dipuduean dek warga bagageh capek.
"Sabalunnyo lah panah tajadi kajadian nan samo (indikasi korsleting), tapi untuang lah capek dikatahui dek warga sahinggo bisa lansuang atehi sabalun api manjalar," kecek salah surang saksi.
Hingga barito ko diturunan, pihak kapolisian basamo tim takaik masih taruih malakuan olah Tampek Kajadian Pakaro (TKP) untuak mamastian banyaknyo karugian sarato mamastian indak ado unsua lain dalam kajadian ko. (Roy)
