PADANG PARIAMAN - Umah badindiang seng Jo tarapal di Korong Lubuak Aua, Nagari Anduriang, Kecamatan 2x11 Kayu Tanam, Kabupaten Padang Pariaman nampak lah balubang atoknyo. Di siko lah Pak Sanusi nan lah baumua 71 Taun, jo kondisi kaki cacaik, tingga surang diri salamo 26 taun.
Bangunan nan lah rusak tu sabananyo indak layak lai untuak diunyi. Tapi, di rumah nan lah lapuak tu pak Sanusi tapaso tingga surang se, sasudah istrinyo maningga, samantaro anak aki-lakinyo marantau ka Jakarta.
Untuak mamanauhi kaparaluon hiduik saari-ari, Gaek 71 taun ko hanyo bisa mangumpuan buah pinang nan jatuah untuak dijua. Itu pun indak tiok ari doh. Paliang sangaik dalam saminggu dapek 3 kilo, atau kiro-kiro Rp30 ribu pajualannyo.
Pitih nan didapek tu jaleh indak ka cukuik untuak mamelok-an umahnyo. Jankan untuak mamelok-an umah, untuak makan saari-ari se lah payah.
Samantaro tu, bantuan dari pamarentah pun indak pernah tibo jo tasampai ka tangan Apak Sanusi.
Kondisi ko nan mambuek inyo tapaso tatauk batahan di umah nan lah usak tu. Lah bakureh bana tiok ari, pitih nan dibao pulang indak sabarapo doh. Kadang-kadang, inyo bacurito indak ado mandapek pitih samo sakali.
Untuak bajalan kalua umah se, Apak Sanusi tapaso mamakai duo tungkek untuak managak-an kakinyo nan lah lumpuah.
Kini ko, Apak Sanusi hanyo bisa maharok-an bana ado bantuan dari pamarentah untuak mamelok-an umahnyo. Dek karano atok jo dindiang rumahnyo nan lah banyak balubang, tiok malam inyo taruih kadinginan. Kasusahannyo samakin parah pulo kok ari lah ujan.
"Paratian Lo lah rakyaik badarai nan marasai sarupo ambo ko. Ambo hanyo maharok-an umah ko dibantu untuak dipelok-an. Untuak tampek bataduah ambo di maso tuo ko," kecek Pak Sanusi jo suaro nan sadiah.
Samantaro itu, Pamarentah Nagari malalui Wali Korongnyo mangaku kok inyo lah babarapo kali mausuean supayo Pak Sanusi ko dapek bantuan. Tapi, usuean tu alun ado tanggapan sampai kiniko
"Hanyo se kakek Sanusi ko baru lo dapek BLT waktu babarapo taun nan lalu. Itu pun hanyo sataun se jalannyo," kecek Wali Korong Lubuak Aua tu panuah raso ibo. (Roy)
