AGAM - Satuan Reserse Kriminal (Satreskrim) Polres Agam barasil maamanan duo urang palaku nan didugo kuek malakuan panyalahgunoan pangangkutan Bahan Bakar Minyak (BBM) basubsidi Bio Solar.
Panangkapan ko dilakuan dek Tim Opsnal Polres Agam pado hari Salasa (2/6/2026) kiro-kiro pukua 17.30 WIB.
Duo palaku nan diamankan ko barinisial M (38), surang laki-laki asa Kinali, Pasaman Barat nan bakarajo sabagai sopir, sarato surang gadih/padusi barinisial SA (28), warga Palembayan, Kabupaten Agam, nan batindak sabagai pambali atau panampuang BBM subsidi tu.
Kapolres Agam melalui Kasat Reskrim AKP Rinto Alwi mangonfirmasi baso panangkapan ko bamulo dari patroli acok nan dilakuan dek Tim Opsnal di wilayah hukum Polres Agam.
"Pas sadang patroli, tim manyobok-an ciek oto truk Mitsubishi Colt Diesel bawarna hitam-oranye jo nomor polisi BA 9930 TA nan mancurigaan di jalan umum Muaro Kandang, Nagari Salareh Air Barat, Kecamatan Palembayan," kato AKP Rinto Alwi.
Sasudah dipareso, truk nan dibao dek M ko dikatahui baru salasai mambongka 13 buah jarigen nan baisi BBM jenis Bio Solar. Caro karajo nan digunoan dek palaku ko tamasuak cadiak, dima tangki minyak truk tu lah dimodifikasi sademikian rupo untuak manampuang BBM subsidi dalam jumlah gadang sacaro ilegal.
Dalam operasi tangkok tangan ko, polisi barasil maamanan sajumlah barang bukti, di antaranyo 1 oto truk Mitsubishi Colt Diesel (warna hitam-oranye, nopol BA 9930 TA) jo kondisi tangki nan lah dimodifikasi, 13 buah jarigen nan baisi panuah BBM jenis Bio Solar.
Untuak mampatangguangjawauk-an pabuetanyo, kaduo Palaku basarato sadoalah barang bukti lah dibao jo diamanan ka Mapolres Agam untuak manjalanan proses penyidiak-an labiah lanjuik. Ateh tindak-an ilegal nan marugian nagari ko, kaduo palaku lah sah ditahan.
Palaku Dijarek jo Pasal 40 angko 9 Undang-Undang Nomor 6 Tahun 2023 tantang Panataupk-an Paraturan Pamarentah Pangganti Undang-Undang Nomor 2 Tahun 2022 tantang Cipta Kerja manjadi Undang-Undang, nan maubah Pasal 55 Undang-Undang Nomor 22 Tahun 2001 tantang Minyak jo Gas Bumi. Urang tu tarancam hukuman pidana pinjaro dek lah manyalahgunokan panyadioan jo pandistribusian BBM nan disubsidi pamarentah. (Roy)
