PADANG PARIAMAN — Kabakaran hebaik malando Pasa Ampalu, Korong Ampalu, Nagari Lareh Nan Panjang, Kecamatan VII Koto Sungai Sariak, Kabupaten Padang Pariaman pado Salasa (2/6) tangah malam. Salain mahanguih-an area pasa, api maluluahlantak oto jo onda punyo masyarakat nan disinan.
Manuruik kaba dari Satpol PP Damkar Kabupaten Padang Pariaman, laporan kabakaran masuak dari masyarakaik pado pukua 03.30 WIB.
Mananggapi laporan tu, patugaih lansuang bagarak capek dari posko masiang-masiang pado pukua 03.35 WIB, sarato tibo di lokasi kajadian pakaro (TKP) kiro-kiro pukua 03.50 WIB.
Kapalo Seksi (Kasi) Pencegahan Damkar Padang Pariaman, Andriadi, manyampaian jikok paristiwa ko patamo bana dikatahui dek warga satampek nan mancaliak api gadang sarato manjala di lingkuangan Pasa Ampalu.
Mangingek banyak bangunan pasa nan murah tabaka, api jo capek manjala sarato mambaka Alaikum - alaik di sakuliliangnyo.
Patugaih pamadaman kabakaran mamparaluan wakatu labiah dari tigo jam untuak majinak-an si jago merah tu. Pamadaman jo pandinginan baru dinyatoan salasai sapanuhnyo pado pukua 06.55 WIB.
Hinggo kini, pihaknyo mancataik ado limo urang panggaleh nan manjadi korban tadampak langsuang akibaik kabakaran ko, antaro lain Zainal (50), Kutar (65), Buih (66), Anuar (62), jo Janimar (70).
Samantaro banyak karugian akibaik kabakaran pasa, ciek oto, jo ciek onda ko dipakiroan mancapai Rp 1,5 Miliar. Namun untuak panyabauk kabakaran, kini masih dalam proses panyalidiakan dek pihak kapolisian.
Untuak maatasi api nan talalu gadang, Satpol PP Damkar Padang Pariaman mangarahkan sadoalah tanago dari babagai posko wilayah, sarato dibantu dek armada dari DS daerah tatanggo. Saindaknyo ado 5 armada nan turun ka lapangan untuak mamadamkan api. (Roy)
