PARIAMAN - Suasano Rayo Haji di Lembaga Pemasyarakatan (Lapas) Kelas IIB Pariaman taun ko taraso lasuah bana. Di baliak dindiang nan tinggi jo pintu basi nan biasonyo jo ukuman, tanyato para narapidana (warga binaan) basamo patugaih lapas malah mampacaliak-an samangaik babagi kapado masyarakaik katek.
Samanjai pagi, warga binaan basamo patugaih lah sibuk lo di lapas. Ado nan mambantu mandabiah, manguduang dagiang, mambungkuih dagiang, sampai lo mamasak untuak dimakan basamo-samo.
Rayo taun ko, Lapas Pariaman mambantai ampek ikua, tadiri dari duo ikua jawi jo duo ikua kambiang. Jawi Jo Kambiang ko didapek dari baiyua patugaih sarato warga binaan disiko.
Kapala Kasatuan Pangamanan Lambaga Pemasyarakatan (KPLP) Lapas Pariaman, Yosua S. Sagala mangatoan baraso kagiatan di lapas ko indak hanyo sakadar ibadah taunan se doh, tapi ko lah jadi bagian dari pambinaan mental jo sosial untuak warga binaan.
“Kito nio warga binaan ikuik marasoan apo makno rayo sabananyo. Indak hanyo manonton se, tapi talibaik langsuang dalam proses babagi jo masyarakaik,” kecek Yosua, Rabu (27/5/2026).
Manuruik inyo, kok warga binaan ko dilibaik-an dalam kagiatan sosial, ko paralu bana untuak manumbuah-an raso paduli. Karano, pambinaan di lapas ko indak urusan ukuman se doh, tapi juo untuak mambantuak baliak sipaik urang tu.
“Di siko kito indak hanyo manjago kaamanan se, tapi juo mambina. Kito nio urang tu punyo raso paduli, raso kabasamoan, jo maraso kalau inyo tu masih bagian dari masyarakaik,” jalehnyo.
Sabagian dagiang korban tadi dimasak untuak dimakan basamo antaro warga binaan jo patugaih lapas. Sadang kan sabagian lai, dibagi-bagi-an ka tukang ojek jo panggaleh ketek - ketek di Pasa Rakyaik Pariaman.
Yosua manyabuik-an alasannyo mamiliah tukang ojek jo padagang pasa ko sabagai panarimo dagiang, karano urang-urang ko tamasuak masyarakaik nan tiok ari bacito mancari makan di jalanan jo di pasa.
“Sabagian urang dagiang ko biaso se nyo. Tapi dek masyarakaik ketek, ko lah jadi sasuatu nan barago bana. Dek karano tu kami nio babagi jo urang tu,” katonyo.
Inyo mangatoan lo kalau kagiatan ko bisa jadi caro untuak mancaliak-an baso iduik di dalam lapas ko hanyo barisi ukuman jo kakarehan se. Manuruik inyo, masih ado nilai kamanusiaan jo sumangaik Basamo -samo nan taruih dibangun di lingkuangan lapas.
“Kadang masyarakaik hanyo mancaliak warga binaan ko dari maso lalunyo se. Padahal urang tu manusia juo nan nio barubah jo nio babuek elok,” tambahnyo.
Di tangah raminyo Pasa Rakyaik Pariaman, dagiang tu dibagi-an ciek-ciek ka tukang ojek jo padagang ketek. Rato-rato panarimo dagiang tu bantuaknyo sangaik sanang. (Roy)
